Janhvi Kapoor Ne Kiya Open Up: “Bollywood Mein Male Egos Handle Karne Ke Liye Kabhi-Kabhi ‘Dumb’ Ban Na Padta Hai”

Bollywood actress Janhvi Kapoor ne recently Twinkle Khanna aur Kajol ke talk show Two Much par apna experience share kiya. Unhone bataya ki film industry mein male ego handle karne ke liye kabhi-kabhi unhe ‘dumb’ banne ka natak karna padta hai. Janhvi kehte hain, “Main abhi bhi seekh rahi hoon ki kaun si baat pe react karna hai aur kaun si pe chup rehna hai.”

Janhvi ne further explain kiya, “Aaj kal main aise rooms mein hoti hoon jahan main apni baat bol sakti hoon bina kisi tension ke. Lekin pehle aise situations aaye jahan mujhe pretend karna padta tha ki mujhe kuch samajh nahi aata. Har jagah apni baat zor se rakhna zaroori nahi hota — kabhi kabhi smartly apni baat rakhni padti hai taaki kisi ko bura na lage.”

Twinkle Khanna, jo Kajol ke saath show host karti hain, ne bhi Janhvi se agree kiya. Twinkle boli, “90s mein mujhe bhi yahi problem hoti thi. Tab mujhe samajh hi nahi aata tha ki itna diplomatic kyun rehna padta hai.”

Janhvi ne aur clarify kiya, “Main abhi bhi seekh rahi hoon ki kab bolna hai aur kab nahi. Kabhi lagta hai ki ye baat important nahi hai, chhodo, agle topic pe bol loongi. Lekin bolne se pehle mujhe 10 achhi baatein kehni padti hain aur aise dikhana padta hai jaise mujhe zyada samajh nahi hai, taaki kisi ko offend na kar du. Warna main seedha keh deti — ‘ye scene galat lag raha hai,’ lekin uski jagah kehti hoon, ‘mujhe samajh nahi aa raha.’”

Janhvi Kapoor Ka Recent Kaam

Janhvi Kapoor recently Sunny Sanskari Ki Tulsi Kumari mein nazar aayi thi — ek romantic comedy jisme Varun Dhawan, Sanya Malhotra, aur Rohit Saraf bhi the. Shashank Khaitan ke direction mein bani ye slice-of-life film audience ko kaafi pasand aayi. Dharma Productions ke hisaab se, film ne worldwide ₹100 crore se zyada kama liya hai.