Shreyas Iyer ICU Mein Admit — Rib Injury Se Internal Bleeding, South Africa Series Se Bahar Ho Sakte Hain

Indian ODI vice-captain Shreyas Iyer ke fans ke liye ek shocker news aayi hai. Australia ke khilaf third ODI ke baad unhe serious rib injury hui hai, jiske baad unhe Sydney ke hospital ke ICU mein admit karna pada. Reports ke mutabiq unhe internal bleeding hua hai, aur doctors unke recovery process ko closely monitor kar rahe hain.

BCCI Aur Doctors Ki Nazar Mein Hai Iyer

30-year-old Iyer, jo recently Australia tour ke liye vice-captain bane the, ne series ke second ODI mein half-century maari thi aur achha form dikhaya tha. Lekin ab unki health condition ne Team India management ko tension mein daal diya hai.

Sources ke according, Iyer ko ek hafte tak Sydney hospital mein observation mein rakha ja sakta hai, uske baad hi doctors unhe India wapas bhejne ki permission denge. Kyunki wo T20I squad ka part nahi hain, to upcoming South Africa ODI series (November se start hone wali) se bhi unka bahar rehna almost confirm lag raha hai.

Kaise Lagi Shreyas Iyer Ko Injury?

Australia ke third ODI mein Shreyas Iyer ne backward point par ek zabardast running catch liya tha Alex Carey ka. Isi effort ke dauraan unhe left rib cage mein chot lag gayi. Pehle to wo dressing room laut aaye, par kuch der baad unhe severe pain aur discomfort feel hua. Turant unhe hospital le jaya gaya, jahan detailed medical tests ke baad internal bleeding detect hui.

Ek source ne PTI ko bataya,“Shreyas pichle kuch dinon se ICU mein hain. Reports aane ke baad pata chala ki internal bleeding ho rahi thi, isliye turant hospital admit karna pada. Infection spread na ho, isliye doctors unhe kam se kam 2 se 7 din tak observation mein rakhenge.”

BCCI Medical Team Ne Di Quick Response

BCCI ke medical team ne tab turant action liya jab Iyer ke vital signs unstable dikh rahe the.“Team doctor aur physio ne koi risk nahi liya aur unhe seedha hospital bhej diya. Ab unki condition stable hai, lekin agar timely action nahi hota to situation critical ho sakti thi. Shreyas strong ladka hai, aur jaldi theek ho jayega,” source ne bataya.

Filhaal, fans aur teammates dono hi unke jaldi recovery ki dua kar rahe hain. Agar sab kuch theek raha, to Iyer December tak wapas field par laut sakte hain.